خوێندکارانی پشدەر و بیتوێن بەشدارییان لە سیمینارێکی گەورەی "هاوینی ئەکادیمی خوێندکاران" کرد

کار و چالاکییەکانی پڕۆژەی “ هاوینی ئەکادیمی خوێندکاران “ لە پشدەر و بیتوێن بەردەوامییان هەیە، لەو نێوانەدا سیمینارێک لەژێر ناونیشانی (بەڕێوەبردنی زنجیرەی دابینکاری- ناساندن، داهێنان و چارەسەرکردنی کێشەکان لە سەدەی ٢١دا) پێشکەشکرا.

کۆمەڵەی خوێندکارانی کوردستان و زانکۆی ڕاپەڕین سیمینارەکەیان بە هاوبەشی Emergency Logistics Team، ڕێکخست، تێیدا ژمارەیەکی بەرچاو لە خوێندکاران و لاوانی دەڤەرەکە. پشێوازییان لێ کرد و بەشدارییان تێدا کرد.

لە سیمینارەکەدا، د.ویڵیام هۆڵدن بەشداربووانی بە چەمک و بنەما سەرەکییەکانی بەڕێوەبردنی زنجیرەی دابینکاری، گرنگی ناساندن و داهێنان لە جیهانی کار و خوێندن، ناساند، جگەلەوەش شێوازە نوێکان بۆ ناسینەوە و چارەسەرکردنی کێشەکان لە سەدەی ٢١دا یەکێکی دیکە بوو لە تەوەرەکانی نێو باس و خواسەکە.

لەلایەکی دیکەوە گرنگی گۆڕینی شێوازی بیرکردنەوە، توانای بەکارهێنانی بیرۆکەی داهێنەرانە بۆ چارەسەرکردنی کێشە و بەرەوپێشبردنی کارەکان، یەکێک بوو لە تەوەرە گرنگەکانی سیمنارەکە.

ئەم چالاکییە بەمەبەستی بەرزکردنەوەی ئاستی زانیاریی و تواناکانی خوێندکاران و لاوان و پەیوەستکردنی فێربوونی ئەکادیمی بە پێداویستییەکانی بازاڕی کار و ژیانی پیشەیی، بەڕێوەچوو.